BETONG, 23 Mac : Projek Selapat Bah enggau Ngemanah Jalai Kubal ditu mesti dipejalaika enggau lengkas, ku Dr Johnical Rayong Ngipa.
Kaban Kunsil Nengeri (ADUN) Engkilili nya madah, kededua projek nya mesti diperunding lalu sebengkah randau randau khas antara Kaunsil Pelilih Betong, Opis Kereja Raya (JKR) enggau Opis Parit Enggau Entali Ai (JPS) Bagi Menua Betong deka diatur dikena ngemujurka perambu nya.
“Jalai Kubal antara jalai ke udah rusak taja udah dikemanah urung 10 taun ke udah nyadi aku deka berandau enggau Kaunsil Pelilih Betong, JKR Betong sereta mega raban DID ungkup perambu ngemanahka jalai nya.
“Pekara silik bekaul enggau projek sereta nya deka dikerandau udah tu ila.
“Iya ke pemadu beguna (projek) nya patut dirumban, enti ulih dalam taun tu laban jalai tu endang jalai besai ditengah enam buah rumah panjai ditu,” ku iya.
Dr Johnical Rayong mansutka pekara nya pengudah bejadika Program Segulai Sejalai Nuju Pemansang Menua N. 33 Engkilili di Rumah Panjai Banta Kuyong, Kubal Batu, ditu kemari.
Dulu ari nya, iya bisi ngemendarka agih belanja nengah Projek Transformasyen Menua Pesisir (RTP) 2025 sepenyampau RM150, 000 ungkup Rumah Panjai Banta Kuyong di Kubal Batu dikena ngemanah perengkaguna ba rumah panjai nya.
Udah nya Biro Indu enggau Biro Pelajar Rumah Panjai Banta diungkup geran Projek Mit Pemansang Menua Pesisir (MRP) sepenyampau RM30,000.
Berebak enggau nya, Rayong terus meransang komuniti di Kubal terus seati betunggang sukung ngagai perintah Gabungan Parti Sarawak (GPS) dibaruh iring Premier Sarawak Datuk Patinggi Tan Sri Abang Johari Tun Openg ngambika mayuh agi pemansang ulih dibai ngagai sitak nya dudi hari.
Enam rumah panjai ke sama nujah Jalai Kubal ke ngembuan pemanjai lapan kilometer tu iya nya Rumah Kubal Duan, kubal baru Kota, Kubal Lumok, Kubal Kota, kubal Pengkalan enggau Kubal Batu.-TVS
