KUCHING, 23 Mac: Bagi orang indu , pengawa nganta ukai semina ngemajikka diri tang meri empas ke besai ba gaya pendiau enggau meri pengandal ngagai sida, lebih agi dalam konteks profesional.
Ku siku Pengajar Ngantaka Mua tauka Makeup Artis (MUA) Sabrina Nayah, 34, madahka, kelas nganta tu diatur betuju dikena mantu orang indu ti ngembuan pengerindu dalam bidang penganta enggau pemajik ke agi bedau meretika teknik nganta ke betul ungkup asil ti manah.
“Kebuah aku ngaga kelas nganta tu laban aku meda mayuh amai bala kitai indu ti rinduka pengawa nganta diri, tang sida mayuh enda nemu chara,” ku iya lebuh dirandau pemberita TVS rambau Kelas Belajar Nganta ke diatur ba Sri Aman Hub Digital kena Hari Enam.
Kelas Belajar Nganta tu dibagi ngagai dua seksyen iya nya teori enggau demokrasyen pengelama sehari ari pukul 10.30 pagi nyentuk ke 4.30 lemai ngaul 10 iku penyereta.
Iya nambah, pemajik ukai semina ngangkatka pengandal diri tang bidang nya meri peluang nyungkak penatai pemisi tambah nengah nyendiaka servis makeup ngagai orang bukai.
“Ambika chunto, nyema bisi orang begunaka servis penganta sida iya, enda salah enti sida nguji enggau rega ari baruh dulu nyadika pengepun.
Nengah latih ke betul, pengelandik nya deka ngerembai lalu ulih meri servis ke lebuh profesional,”ku iya.
Martina, entara siku penyereta kelas nganta ke mega gawa ba Opis Sri Aman Digital Hub berasai tepantup ati laban diatu iya bisi pengarap ke tinggi mantaika diri ba mua mayuh ninting hari.
“Suba aku semina nemu nganta mimit-mimit, tang diatu aku udah nguasa teknik ripih nganta ari pun nyentuk ujung. Tetiap teknik enggau produk diatu udah dipelajar aku,”ku iya.
Nangkan ke nya, siku indu misi ke gawa ba Sepital Sri Aman, Jessica Mundun, 41, madahka, gaya pendiau diri tauka dikumbai ‘first impression’ beguna amat dalam dunya profesional.
“Orang deka meda kitai ari mua dulu. Lebuh kitai datai gawa enggau mua puchat, orang deka ngumbai kitai baka ke orang agi sakit, tang enti kitai datai enggau mua manah bisi nganta mimit, tu deka meri empas ke positif.
“Ukai kitai aus jaku puji orang tang sekeda orang engka lebih nyamai lebuh meda kitai enggau pendiau ti badas enggau bajik,” ku iya.
Kelas nganta ti diatur Sabrina ukai semina belajar pekara kosmetik enggau bidang pemajik, tang muka peluang karier ti meri penguntung ke besai.
Berindik ari nya, iya ngarap deka mayuh agi orang indu nguna pemaik peluang tu lalu enda takut ngerembaika bakat dalam bidang penganta. – TVS
