SERIAN, 23 Mac: Muara Tebas dipilih nyadi palan ngaga Markas Wilayah Tasik 4 (Mawilla 4) Soldadu Tasik Diraja Malaysia (TLDM), ku Panglima Raban Soldadu Jeneral Datuk Mohd Nizam Jaffar.
Iya madah pengudah beratika bemacham pekara nyengkaum perengkaguna enggau ungkus ngeripir, Muara Tebas diperati chukup nemban nyadi pangkalan baru Soldadu Tasik Diraja Malaysia (TLDM) ari palan asal ke diperambu iya nya Bintulu.
“Randau tumu enggau Perintah Nengeri Sarawak udah diatur, kededua raban (Perintah Nengeri enggau Raban Soldadu Malaysia) setuju pindah ke Muara Tebas ketegal mayuh pekara bekaul.
“Enti ba Bintulu, ungkus ngeripir dedin deka lebih besai. Kitai udah berunding ari sukut ungkus, pansik pengulih enggau infrastruktur ungkup pengkalan nya,” ku iya madah ngagai pemberita pengudah tembu Penemuai Gawa ke Markas Taktikal Balai Ringin ditu, sehari tu tadi.
Mohd Nizam madah, pengkalan baru nya deka nyadi antara pengkalan tasik moden di Sarawak, lalu pengulih iya deka sebaka enggau Pengkalan TLDM Teluk Sepangar, Sabah.
“Pagila, ATM deka ngabas taba ba Muara Tebas sereta berunding pasal atur enggau udah nya kitai begunaka sebuah pengkalan TLDM di Sarawak,” ku iya.
Ngelansa pasal pengelikun ba adan menua, iya madah penyampau pos jaga Malaysia enggau Indonesia patut sama, kelimpah patut ngaga peresa dikena numbuhka pos kunsi antara kededua menua ngambika pengelikun ba adan menua ulih ditegap.
“Diatu, bisi lima pos kunsi Malaysia-Indonesia, kitai mega deka beratika pematut nambahka perengkaguna Kompleks Imigresen, Kastam enggau Kuarantin (ICQ) di sempadan.
“Nyema Indonesia ngembuan ICQ ba adan menua sida, kitai mega patut bisi dikena nentuka ICQ berimbai iya nya ba sepiak menua kitai dikena nyeliahka raban ke tama enggau pansut tiris,” ku iya.
Iya madah siti penemuai gawa deka diatur kena Mei tu nyengkaum Opis Menteri Dalam Menua, Opis Menteri Penyaga Menua, Kastam enggau Imigresen ungkup berundingka atur pemadu manah dikena ngatur pengawa nyaga adan menua ngambika lebih ngasi.-TVS
