KUCHING, 22 Mac: Siku lelaki beumur 33 taun peranak menua Indonesia bebadi nyawa pengudah kena tinggang tanju traktor buah sawit ba sebuah ladang sawit di Jalai Ulu Sebauh, Bintulu.
Nitihka penerang ari Opis Pengelikun enggau Pengerai Pengereja Pengawa (JKKP) Sarawak penusah tu nyadi kena 15 Mac tu tadi urung pukul 1 ngalih hari.
Tudah ke bebadi begulai enggau deriba traktor benung munggahka tandan sawit mata ke dalam tanju traktor lalu enda memukai traktor nya tegelinchir ngagai tisi jalai.
“Penusah nyadi maya deriba traktor deka surut lalu ngejik tanju traktor ke bisi buah sawit, enda memukai tanju nya terus ninggang tudah ke benung bediri ba sepiak traktor nya.
“Tudah lelaki ke kena tinggang tanju traktor udah nya terus dibai ngagai Sepital Bintulu lalu Pegawai Perubat ngenuku ke tudah lelaki udah mutus seput,” ku penerang JKKP ke dibantaika sehari tu tadi.
Berebak enggau nya, dua iku pegawai pansik ari JKKP Bintulu udah bejalaika pansik tumu ngaul insiden nya.
Bisi tiga iti notis tagang udah dibantai ungkup serikat ladang sawit nya lalu kes dipansik nitihka Seksyen 15 (1) Akta Pengelikun enggau Pengerai Pengereja Pengawa (AKKP) 1994.
Atur undang-undang deka dipejalaika ngagai raban ke bekaul nyema ditemu ngelanggar AKta Pengelikun enggau Pengerai Pengereja Pengawa (Akta 514).
Dibaruh akta tu, ukum maksimum ungkup pengaji iya nya RM500,0000 nyema dikenuku salah.-TVS
