KUCHING, 22 Mac: Siku anak Iban, asal ari menua Lubok Antu dichiri nyadi Presiden Gerempung Graduet Dayak Sarawak (SDGA) ungkup timpuh 2025-2027.
Presiden Gerempung Graduet Dayak Sarawak (SDGA), Ts. Rizzo Mungka anak Rechie madahka mayuh bengkah aktiviti sereta pelin udah diperambu dikena ngemansangka agi gerempung tu.
“Entara timpai raban SDGA baka ke serak tu iya nya mekuh ngagai strategi pemansang pasca COVID19 (PCDS 2030) ti deka ngerembaika SDGA nengah kolaborasyen ti strategik enggau ejensi perintah, industri enggau ejensi pelajar,”.
“Ngemansangka bidang pansik enggau pemansang inovasyen dikena mantu dalam transformasyen digital, pemeruan ekonomi enggau ngenanka budaya,” ku iya.
Rizzo mega madahka aspirasyen iya serak tu iya nya negapka komuniti Dayak nengah pengawa ngemansangka tuai dalam nguna digital ba pengawa dagang ungkup pemansang ekonomi digital.
“Nengah inovasyen enggau kolaborasyen, SDGA deka megai tanggungpengawa dalam nempa komuniti Dayak ngambika ulih nyadi tuai komuniti Dayak seraya mantu dalam penumbuh digital enggau ekonomi menua tu.
Nangkan ke nya, Penyanding Penemu SDGA, Sr Gary Ningkan madahka komiti SDGA ungkup timpuh 2025-2027 tu entara komiti ti dinamik sereta raban profesional ti datai ari mayuh bengkah profesyen.
“Aku pechaya kaban Exco tu deka neruska penyulut SDGA nyadi gerempung ti efektif sereta proaktif lalu terus ngemansangka diri begulai enggau perintah Sarawak dalam nyapai pemansang”.
“Juluk aku ungkup kaban Exco tu ngambika sida seruran fokus sereta menatika peminta komuniti Sarawak lebih agi raban graduet ke baru masuk ngagai industri tauka karier, sereta baka ni sida ulih besemekih ba renggat global,” ku iya.
Aum Besai Ninting Taun ti ke-20 serak tu nyiri Ts. Rizzo Mangka nyadi Presiden SDGA, ditangkan ke enggau Jordan Anthony Layan dichiri nyadi Sapit Presiden, Reily Repai anak Maringai (Mandal Presiden Iban), Walter Sanggai Anak Uden ( Mandal Presiden Bidayuh), Rudy Ujang (Mandal Presiden Orang Ulu), Cliff Jude Zehnder ( Sekretari Besai ), Shalene Durie (Penulung Sekretari Besai), Marvin Sait Winston (Pekara Wang), Aileen Kumang (Penulung Pekara Wang), lalu raban komiti iya nya Alexandra Nastassia, Franklin Lingga, Jacob Anak Jim, Kimberly Anak Wang, Lundy Joe Sibat, Melvin Jangga, Phoenicia Christ enggau Priscilla John. -TVS
