KUCHING, 22 Mac: Ulah semampai ngemaruhka diri, ngembuan integriti enggau bebasaka pangan diri iya nya tiga pekara ti mesti dikemeratka dalam gerempung, ku Kedu Presiden Gerempung Graduet Dayak Sarawak, Dr. Florianna Lendai.
Pia mega, ku iya dalam sesebuah gerempung ukai dikuasa perintah (NGO), penegap gerempung ukai semina bepanggai ba strategi, inovasyen enggau visyen tang bepanggai ba ulah siku-siku orang dalam ngemansangka gerempung nya.
“Aku ngasaika ba peneleba aku empu, nyadi siku tuai ukai lebuh maya ke senang aja tang nyadi tuai tu baka ni chara nuan ngiring ngembing sekalika ngaga pemutus lebuh bisi penanggul nyadi dalam gerempung nya,” ku iya rambau bejaku ba Aum Besai Ninting Taun SDGA Ke-20, ba DCCI Tower ditu, pagi tadi.
Pengelama mangku pengawa nyadi Presiden (SDGA) ku Dr. Florianna, mayuh bengkah program mujur dipejalaika raban SDGA dalam ngemansangka komuniti Dayak lebih agi raban nembiak Dayak.
“Raban SDGA mujur ngatur program pemansang enggau raban nembiak ba sekula lebih agi ba sekula menua pesisir, ngatur forum pasal pemansang pelajar sereta besilih penemu enggau raban tebangkar dikena ngemansangka agi gerempung nya,” ku iya.
Nya alai, iya ngarapka kaban komiti ke baru tu ila ulih ngemansangka agi raban SDGA ukai semina dikena ngemansangka raban nembiak dalam bidang pelajar tang mega mekuh ngagai aspirasyen perintah nengeri ke deka nempa Sarawak nyadi sebuah nengeri mansang rambau taun 2030 enggau nempa raban sekalika komuniti Dayak dalam pengelandik ekonomi digital, pemintar artifisyel (AI), teknologi digital sereta ke bukai. – TVS
