KUALA LUMPUR, 22 Mac : Ukum lebih berat ungkup sida tu deriba enda mereti patut dipejalaika dikena ngurangka penyampau pemati enggau bakal ketegal aksiden ba jalai raya lebih agi maya musin pengerami, ku Chairman Serakup Komuniti Likun Tan Sri Lee Lam Thye.
Nengah sebengkah penerang sehari tu, iya ngansak perintah enggau raban penerit adat nambahka ikas tunggu seraya mantaika ukum ngantung lisin ngagai raban deriba kelalu laju enggau ngelih entukar bukai chara enda beradat.
“Orang ke betandu ngereja penyalah patut diambi atur undang-undang ke lebih terit nyengkaum ukum jil,” ku iya.
Aktivis rama nya mega ngemeratka pematut neritka atur ke lebih berat ngagai entukar besai ti mayuh ngujungka kes pemati ketegal aksiden ba jalai raya.
“Atur meresa ke terit mega patut dipejalaika dikena nentuka entukar dikena bejalaika pengawa dagang seruran likun sereta deriba enda lelak, tauka bisi ngambi dadah sereta ai bisa,” ku iya.
Lee madah Polis Diraja Malaysia (PDRM) enggau Opis Pengangkut Darat (JPJ) patut chakah agi bejalaika pengawa nengah atur nganjung mayuh agi pegawai penerit adat ba jalai raya lebih agi ba kandang endur ke suah nyadi penusah bebadi.
Iya mega madahka kamera jaga ke disikap enggau teknologi pemintar tempa (AI) enggau sistem ngelala lumur rejister automatik (ANPR) mega patut dikerembai dikena nyidi pesalah trafik.
Lee mega minta deriba ke bejalai jauh patut belelak enggau lengkas meresa entukar sebedau semak musin pengerami lebih agi baka bas ekspres enggau lori.
“Taja pengawa nerit atur beguna, ngelatih ulah deriba ti mereti mega antara pekara ke chukup beguna.
“Kimpin penyedar patut ditarak ba semua orang, ulah deriba likun enggau pangka deriba berumban mesti dirunding ke pemaik diri sebilik enggau orang bukai,” ku iya.
Ku tandu Lee, musin pengerami patut nyadi awak ngelantang ati lalu ukai pulaika penusah.
Enti nadai atur ke terit, ukum berat enggau atur nguna teknologi moden, pemidang nyawa ba jalai raya deka terus nyadi.-TVS
