KANOWIT, 21 Mac: Balai Bomba enggau Penyah Penusah Kanowit nerima kangau urung pukul 11:15 pagi tadi ungkup servis khas mantu sebengkah penusah rabat iya nya nganjung sentubung ngena bot berindik ari jalai darat ngagai Rumah Guntur, Nanga Ngemah, Kanowit kena ampuh bah.
Sepengudah nerima ripot, dia Balai Bomba enggau Penyah Penusah (BBP) Kanowit, tim Bravo datai ngesah penusah nya.
Nitihka sebengkah penerang ti dikunsika Balai Bomba enggau Penyah Penusah (BBP) Kanowit, sepengudah datai ba alai penusah nya nyadi, Komander Operasyen PBK 1 (TBBK 1) Badrulhisam tepedaka jalai nuju ngagai Rh Guntur, Ngemah, Kanowit ampuh enda ulih ditengah kerita dikena nganjung sentubung.
Komander operasyen lalu minta raban bomba enggau orang ke ngempu penusah rabat ngatung sentubung nya ngagai bot penyah penusah bomba ngambika ulih dibai nengah Sungai Ngemah, Rh Guntur, ngagai Jematan Majau Kanowit.
Raban bomba mupuk mulaika diri ngagai balai sepengudah sentubung nya mujur dianjung datai ba rumah panjai. – TVS
