KUCHING, 20 Mac: Sepital Besai Sarawak (HUS) benung ngiga aris tauka orang ke sebilik enggau siku pesakit Mohd Fikhrie bin Yusuf, 35 asal ari Jalan Parit Lama, Satok ditu.
Nengah sebengkah penerang HUS madahka, tudah pesakit tu dianjung berubat ngagai Unit Emejensi enggau Trauma, HUS ngena ambulans kena 13 Mac tu tadi.
Taja pia, naka sehari tu nadai siku sida sebilik tauka kaban belayan udah ngabas tudah ke benung diperubat ba sepital.
Raban sepital begunaka saup sida sebilik datai ngagai sepital ungkup tuju ngatur pelin perubat enggau atur bayar ungkus perubat.
Naka tu tudah agi diperubat ba Zon Kuning, Unit Emejensi enggau Trauma, HUS sereta diripotka udah belinsur gerai.
Nya alai, raban sepital ngarapka sida sebilik datai lengkas ngagai Zon Kuning, Unit Emejensi enggau Trauma, HUS tauka betelefon terus nuju Pegawai Kereja Rama Perubat Encik Ringkai anak Batang ba lumur 082-276666 tauka 082-2766252. -TVS
