LAWAS, 20 Mac: Sebuah hotel di Lawas napi pengerugi RM2,000 sepengudah siku lelaki ke mai senyata tajam ti dipelaba ilang mechah masuk ke dalam hotel nya, tengah malam tadi.
Tuai Polis Pelilih Lawas DSP Liong Tindan madahka kes enchuri nya mega ngerekai ba laman rama ti dipechaya nyadi urung pukul 12 tengah malam.
Ku iya madah, ripot kes enchuri nya diterima raban iya tengah malam ari orang ke ngeripot ke mega siku ari pekereja ba hotel nya.
“Lebuh penusah nya nyadi penyaga kaunter madahka bisi orang tama ngelawa mua kaunter lalu ngambi duit ke bisi ba kaunter lebuh penyaga nya benung meresa irkon ke diripotka bisi rusak ba sebuah bilik ba hotel nya,” ku iya.
Liong madahka, asil tasat tumu ari raban polis ba palan penusah nya nyadi nyengkaum ba CCTV tepedaka siku lelaki ke enda dipeda mua, ngena baju bansa hoodie ti tama kaunter ngusaika barang lalu ngambi duit ba kaunter nya.
“Video rikod kamera tetutup (CCTV) tepedaka saspek mai siti senyata tajam lebuh tama ngagai kaunter,” ku iya.
Iya madahka madah kes nya diklasifikasyen nitihka seksyen 380 Kanun Keseksaan iya nya enchuri laban lebuh pekara nya nyadi nadai orang meda nyengkaum pekereja ba kaunter nya.
Nangkan ke nya ku iya, polis benung chakah nyidi saspek lalu mensia mayuh ke ngembuan penerang bekaul pekara nya dipinta datai mantu tasat lalu betelefon ngagai IPD Lawas ba lumor 085-283037.
“Polis mega ngelalau mensia mayuh ngambika bulih penerang ti engkeman dikena nyeliahka penyaru sereta penusah ati mensia mayuh. Gaya ba pelilih Lawas mengkang likun sereta dipatau rat,” ku iya. – TVS
