KUCHING, 20 Mac: Kerejasama strategik entara Opis Menteri Pengerai Malaysia (KKM) enggau Opis Kereja Raya (JKR) Sarawak endang beguna amat dikena nentuka pemujur semua projek pemansang infrastruktur pengerai di selampur nengeri tu.
Direktor JKR Sarawak, Dr Cassidy Morris madahka, pengawa betemu seraya berandau entara JKR Sarawak enggau deligit KKM ti diarika Direktor Pengerai Nengeri Sarawak, Dr. Veronica Lugah Hari Tiga tu tadi siti pengerembai ke positif.
“Nengah pengawa berandau tu, KKM enggau JKR Sarawak ulih ngelala entara pemar ke ditapi, seraya ngiga chara pemadu manah dikena mutarka pemar nya dalam aspek pengatur projek,” ku iya nengah sebengah penerang dalam Facebook JKR Sarawak kemari.
Ku terang Dr Cassidy, JKR Sarawak komited meri sukung penuh ngagai KKM dikena nentuka tetiap inisiatif pemansang infrastruktur pengerai ulih dipejalaika sechara sikar sereta semitan.
Iya madah, kerejasama ti rat entara KKM enggau JKR Sarawak mega mesti ditegutka ungkup pemaik rayat sereta ngemeratka pemansang sistem pengerai ke lebih efisien enggau meruan di wilayah tu.
Sebedau tu, Dr Cassidy bisi nyebut senentang komitmen JKR Sarawak ti deka terus mekuhka pemansang infrastruktur ke bekualiti ba kandang menua pesisir.
“JKR Sarawak seruran nengkira diri mantu nambahka pemanah bungkur infrastruktur pemun ba menua ulu, nyerangkung jalai enggau jematan ngambika meri pengelantang sereta pengelikun ngagai perayat lokal,” ku iya. – TVS
