KUCHING, 20 Mac: Galeri ti deka digaga dalam begunan Gerempung Serakup Orang Ulu Sarawak (FORUM) nyadi siti endur ke nemban dikena mandangka pasal sejarah, lanting bansa, budaya enggau chara pengidup komuniti Orang Ulu.
Sapit Menteri ba Opis Premier Sarawak (Pengereja Pengawa, Imigresyen enggau Matau Projek) Datuk Gerawat Gala madahka, agih tambah udah dikemendarka Premier Sarawak Datuk Patinggi Tan Sri Abang Johari Tun Openg dikena ngemujurka projek ngaga galeri nya.
“Agih tambah ti dikemendarka perintah nengeri nya mega deka dikena ngaga endur parking kerita ke baru sereta ngemanahka tikas balai besai ke bisi ba dalam begunan FORUM tu jemah,” ku iya.
Iya mansutka jaku nya nengah sebengkah penerang ba laman Facebook pengudah nerima penemuai basa ari Presiden Gerempung Serakup Orang Ulu Malaysia (FORUM) Kennedy Chukpai Ugon ti begulai enggau sekeda raban komiti begunan FORUM, kemari.
Gerawat ke mega Kaban Kunsil Nengeri (ADUN) Mulu nerangka, entara pekara ti bisi disebut maya program nemuai nya ngaul sekeda pengawa ngubah begunan FORUM di Miri, tebal agi galeri ti deka digaga enda lama agi.
“FORUM udah nyiri Impact Design Associations Sdn Bhd nyadi kunteriktor ngaga turai tukuh galeri ke deka digaga nya.
“Aku andal Impact Design Associations Sdn Bhd ngembuan mayuh peneleba ba dalam bidang ngaga turai tukuh sereta projek bukai sebedau tu,” ku iya.
Tandu iya, kompeni nya mega kala ngaul diri ba pengawa ngaga turai tukuh Muzium Budaya Borneo.
Kennedy rambau program nemuai nya bisi madahka, Abang Johari ngemendarka geran tambah penyampau RM5 juta dikena mantu ngemujurka pengawa ngaga galeri nya 3 Disember 2024. – TVS
