BINTULU, 20 Mac: Lebih 300 iku pengani lenyau palan alai diau sepengudah 27 pintu Rumah Panjai Lapie, Sungai Binai, Ulu Sebauh, angus pagi tadi.
Jurujaku ari Opis Bomba enggau Penyah Penusah Malaysia (JBPM) Sarawak madahka, raban iya nerima kangau ngenyit bekaul enggau kes nya urung pukul 11.09 pagi enggau ngerahka 17 iku kaban ari Balai Bomba enggau Penyah Penusah (BBP) Bintulu ngagai palan alai penusah nya nyadi.
“Sepengudah datai ba palan penusah nya nyadi, api agi mau nganguska semua 27 pintu ari 30 pintu rumah panjai nya. Tiga pintu rumah panjai agi mujur diselamatka dalam penusah angus tu,” ku iya dalam sebuah penerang ti dipansutka sehari tu tadi.
Nangkan ke nya ku iya madah, siku lelaki ti beumur urung 70-an diripotka sendat seput.
“Tudah udah dianjung berubat ke sepital nguna EMRS bomba, pengani bukai diripotka selamat sereta enda ngembuan sebarang bakal.
“Operasyen madamka api dipejalaika ngena dua iti hos, 400 kaki, lima nozel ai tebuka enggau bantu ari ai ba tanki ai bomba nyentukka api mujur dirara urung 30 minit udah nya,” ku iya.
Taja pia kebuah penusah tu nyadi sereta pengerugi bekau ari penusah tu agi ditasat. – TVS
