SARATOK, 19 Mac: Kaban Kunsil Nengeri (ADUN) Krian, Friday Belik udah ngulu Program Randau Nyukat Tanah Temuda Bansa Asal (NCR) di sitak Babang enggau Krangan Rusa ti diatur ba Rumah Jebin, Babang Tengah, Hari Dua.
Nengah penerang pemadu baru ba laman Facebook iya, iya madahka, program tu diatur Opis Tanah enggau Survei Bagi Menua Betong betuju dikena ngerumban pengawa nyukat tanah di kandang menua nya ngambika bulih pengaku hak tanah Bansa Asal (NCR).
“Agi mayuh kandang menua di Babang ke bedau digazet enggau bedau bulih pemendar ungkup nyukat tanah ba baruh Seksyen 18,” ku iya.
Beduduk enggau nya, Opis Tanah enggau Survei ngelalau Tuai Raban Bansa enggau Tuai Komuniti (KMKK) sitak Babang lengkas nganjung peminta ngambika proses nyukat tanah ba baruh Seksyen 18 ulih dipejalaika.
Friday nyemetak madahka komitmen iya dalam negika hak tanah Bansa Asal enggau nentuka proses nyukat tanah ulih dipejalaika sereta dirumban ungkup pemaik komuniti seraya muka peluang pemansang ekonomi ti meruan.
“Proses nyukat tanah tu ngaul pemesai 901 hektar di Babang enggau lebih 300 hektar di Krangan Rusa pengudah nerima pemendar ungkup bejalaika pengawa nyukat tanah nitihka Seksyen 18 nyentuk Seksyen 18,” ku iya.
Program Randau Nyukat Tanah Temuda Bansa Asal (NCR) sitak Babang enggau Krangan Rusa tu mega bisi digulu pengari Pegawai Tadbir Penguasa Opis Pelilih Mit Ng.Budu, Muammar Syabil Mohtada, Pegawai Opis Tanah enggau Survei Bagi Menua Betong enggau Penghulu Anyum Kinyeh sereta bala tuai rumah. – TVS
