BINTULU , 19 Mac: Nembiak sekula ba SMK Tatau dipinta chakah agi belajar sereta ngiga pemandai sekalika penemu ngambika bisi peluang nampung pelajar ngagai renggat universiti.
Dr Layang Ugek, kedu Prinsipal SMK Tatau ngarapka SMK Tatau bisi daya ngetanka penyulut enggau tikas pemujur ba dalam bidang akademik, tebal agi ba dalam peresa Sijil Pelajaran Malaysia (SPM) enggau Sijil Tinggi Persekolahan Malaysia (STPM).
“Sijil Pelajaran Malaysia (SPM) iya nya peresa ke chukup beguna amat dalam nentuka pengidup jemah, sekalika nembiak ulih nampung pelajar sida tauka enda. SPM nentuka pengidup kitai sekalika kitai ulih terus idup tauka mati dalam pengidup,” ku iya.
Nangkan ke nya Dr Layang ngelalau nembiak pom 6 ti benung nyikap diri ngambi peresa neruska tandu pelajar enggau belajar sechara beraban.
“Pemujur dalam pelajar enti nadai kerejasama sigi bisi tusah mimit deka dijapai. Nya alai, kita (nembiak) mesti meri tumpu ba dalam pekara pelajar. Pia mega, aku ngarapka semua bala kita bela ulih nyapai pemujur dudi hari,” ku iya agi.
Dr Layang ti ngembuan peneleba ba dalam bidang nyadi pengajar pengelama 35 taun badu megai pangku pengawa nyadi prinsipal SMK Tatau kena Hari Minggu nyin kemari, 15 Mac 2025.
Iya ti asal ari Batu Bansu, Balleh, Kapit kala besekula ba SK Nanga Mujung Kapit sebedau besekula ba SMK Kapit.
Pemujur pemadu tinggi iya ba dalam bidang akademik, bulih Doctor Of Philosophy dalam taun 2018 ari Universiti Kebangsaan Malaysia (UKM). – TVS
