KUCHING , 19 Mac: Sarawak deka ngatur aum Literasi Jaku English Sarawak (SELC) 2025 disadang deka dipejalaika berengkah ari 17 nyentuk ngagai 19 September 2025 ba Hikmah Exchange Event Centre, Kuching.
Sapit Menteri Nembiak, Lumba enggau Main sereta Pemansang Pedagang Sarawak, Dato Gerald Rentap Jabu madahka SELC 2025 nandaka pengepun inisiatif transformatif Sarawak dalam ngangkatka literasi jaku English ti nyadi penyungkak besai pelajar sereta penumbuh raban profesional.
“Sepemanjai timpuh tu, kami deka nyereta dalam pengawa berunding ke ngembuan mayuh reti, bekunsika atur ti pemadu manah sereta nyeranggap strategi inovatif dikena ngangkatka literasi Jaku English ungkup pemaik nembiak sekula kitai.
“Aum tu mekuhka ngagai pemansang pengereja pengawa ti landik sereta sikar, tebal agi dalam bidang Sains, Teknologi, Injiniring enggau Matematik (STEM),” ku iya.
Kelimpah ari nya, penyeraris projek ungkup Komiti Pemansang Pelajar Layar (LEDC),Dr. Steve Ancheh madahka SELC 2025 mega deka mantaika pekara ti dikerandau pasal integrasyen stem-fonik, iya nya pengawa nguna Jolly Phonics dalam pelajar sains, teknologi, injiniring enggau matematik (STEM).“Aum tu mega deka mai dua raban iya nya ‘Jolly Learning Group’ enggau STEM United Kingdom (UK),” ku iya.
SELC 2025 diatur Komiti Pemansang Pelajar Layar enggau sukung ari Opis Menteri Pelajar, Inovasyen enggau Pemansang Bakat Sarawak (MEITD) sereta Business Events Sarawak (BESARAWAK).
Entara pengelicha enggau tebangkar ke bisi nyereta aum nya iya nya Gilbert Jolly, Sara Wernham enggau Sarah Dagnell.
Achara nya disadang deka matak penyereta lebih 1,000 iku pengari, nyengkaum pengajar, nembiak sekula, raban tuai korporat sereta pegawai perintah ari selampur Sarawak. – TVS
