KUCHING, 19 Mac: Polis ngesahka lima iku lelaki perayat lokal ditangkap bekaul enggau siti video ti ngekai ke mandangka insiden belaya ba Jalai Rubber, Satok sehari tu.
Tuai Polis pelilih Kuching, ACP Mohd Farhan Lee Abdullah madahka sida ti ditangkap tu berumur entara 18 nyentuk ke 35 taun urung 1.40 tengah hari tadi.
“Insiden nya nyadi berindik ari bunyi injin sereta ekzos kerita ke inggar lalu pekara tu nadai kaul enggau sebarang isu etnik tauka bansa,” ku iya madah dalam siti penerang sehari tu.
Ku iya madah, kes ditasat ba baruh Seksyen 148 Kanun Keseksaan ti ulih ditinggang ukum jil enda datai lima taun tauka ukum mata duit tauka kedua-dua sekali.
Iya ngelalau mensia mayuh ngambika enda nyadung video nya laban ulih mai pengirau ati sereta ngeruga pengelantang mensia mayuh sereta komuniti.
“Aku ngelalau mensia mayuh ngambika enda ngadu pemutus kediri empu ti tau ngelanggar undang-undang,” ku iya madah.
Mensia mayuh ke bisi penerang senentang kes nya betelefon ngagai Palan Pematau IPD Kuching ba lumur 082-24444 tauka Pegawai Tasat Inspektor Ridzainuddin Rosley Abdullah ba lumur 010- 943-1149 . – TVS
