BELAGA, 19 Mac: Bisi kurang lebih 5 ribu iku anak ikan Tengadak enggau Lampam Jawa dilepaska ke dalam sungai Paran, Rh. Naha Nyabong Hari Dua tu tadi.
Program ngelepaska anak ikan nya dipejadika Sapit Menteri Industri Pemakai, Komoditi enggau Pemansang Wilayah Sarawak, Datuk Dr Abdul Rahman Ismail.
Nitihka sebengkah penerang ti dipansutka ba Facebook, Abdul Rahman Ismail ke mega Kaban Kunsil Nengeri (ADUN) Bukit Kota madahka tuju pengawa ngelepaska anak ikan nya dikena nambahka pengeluar ikan sungai lokal ti tau mantu nyungkak penatai pemisi perayat ti diau di kandang menua ulu sekalika menua pesisir.
Nangkan ke nya ba program nya mega, iya bisi meri turu penyampau RM5,000 ngagai Komiti Pemansang enggau Pengelikun Genturung Pendiau (JKKK) Rh Naha Nyabong.
Pemesai bukai ke bisi datai iya nya Sapit Menteri Utiliti enggau Telekomunikasyen Sarawak ke mega ADUN Belaga Datuk Liwan Lagang, Sekretari Politik Premier Sarawak Thomas Balan Bang sereta ke bukai.
Ba hari ke sama, Datuk Dr Abdul Rahman Ismail, ke mega Chairman Kaban Kaunsil Direktor (AJP) Gerempung Peladang Negeri Sarawak (PPNS) bisi ngulu aum Gerempung Peladang Kandang Menua (PPK) begulai enggau PPK Belaga ba Opis Betanam Betupi Pelilih Belaga.
Seninjik ninga penerang pasal pengerembai pemadu baru ari PPK Belaga, iya bisi merambu kerejasama ngaul PPNS numbuhka kompeni dagang kunsi nengah dagang input betanam betupi ti nyadi sebagi ari perambu PPK ba kandang menua nya.
Tuju nya dikena nambahka penatai pemisi nengah projek bekal sereta ngeluarka ikan sungai, kasam ikan sungai, salai ikan, ikan masin sereta kerupuk ikan. – TVS
