KUCHING , 19 Mac: Dikena nentuka penegap rega sereta bekal barang ke diguna ninting hari chukup sepanjai bulan Ramadan, Opis Menteri Dalam Menua enggau Kos Pengidup (KPDN) Sarawak deka neka negapka pengawa nyaga hak penguna nengah chara ngelancarka Ops Pantau 2025.
Direktor KPDN Sarawak, Matthew Dominic Barin madahka operasyen nya deka mekuhka ngagai pengawa matau rega barang ke dijaga, matau barang ti dijual murah sereta nentuka pengawa ngena perengka timbang ti engkeman ba premis dagang.
Kelimpah bejalaika pengawa matau sechara fizikal ba premis dagang, Ops Pantau mega ngaul pengawa meresa ba bazar ramadan, nyengkaum di Stutong Kuching, bedau lama tu tadi.
“Bedau lama tu tadi kami udah ngagai Bazar Ramadan ba Stutong, lalu ba dia, kami udah bejalaika pengawa meresa tauka bejalaika Ops Pantau tu.
“Kami bejalaika operasyen tu sepanjai jam enggau aku mega meda rega ba dia enda kelalu mar laban bisi pilih, bisi bida rega ba dia. Nyadi, penguna tu mesti pandai, mesti pintar milih laban rega nya, rega markit nya bepanggai ngagai pemintar penguna empu,” ku iya.
Pengerami ngintu Hari Hak Penguna Sedunta ngesan tangkup pengawa nyadi pelasar dalam meri penyedar enggau pelajar pasal isu penguna sereta ngangkatka atur negapka penguna ba renggat antarabansa. – TVS
