KUCHING, 22 Feb: Sarawak ngembuan juluk deka ngetanka gelar champion penuh ba Lumba Malaysia (SUKMA) ba edisyen ke deka datai di Selangor ba taun 2026.
Menteri Nembiak , Lumba enggau Pemansang Pedagang Sarawak, Dato Sri Abdul Karim Rahman Hamzah madahka, SUKMA 2026 deka nyadi pemar kebendar ngagai kontinjen Sarawak dalam ngetanka status nyadi kuasa besai ba lumba enggau main di Malaysia.
“Taun baru, SUKMA deka diatur di Selangor lalu nya deka nyadi penguji ke bendar sekalika kitai ulih nyadi kuasa besai lumba enggau main. Taun nyin kemari, pengudah 33 taun, kami mujur ngulihka gelar champion penuh.
“Enti kitai nyikap diri enggau manah, aku pechaya dini-dini endur atlit Sarawak diengkah, kitai ulih mujur,” ku iya.
Iya mansutka jaku nya rambau Pengerami ‘Makan Kenangan Menggamit Jiwa’ ti diatur Opis Menteri Nembiak, Lumba enggau Pemansang Pedagang Sarawak (MYSED) 2025 ditu, malam kemari.
Nangkan ke nya, bekaul enggau pengawa ngatur Lumba SEA 2027, Abdul Karim madahka, iya deka betemu enggau menteri nembiak enggau lumba, hannah yeoh kena 26 haribulan dua tu ila, dikena berandauka langkar kereja enggau penyikap Sarawak ti nyadi siti ari tiga nengeri ke nyadi tuai rumah begulai, kelimpah Kuala Lumpur enggau Pulau Pinang.
“Kitai udah nyikap diri sereta andal enggau penau diri lalu tu kebuah opis menteri enggau ejensi-ejensi ba baruh Opis Menteri Nembiak, Lumba enggau Pemansan Pedagang Sarawak patut nyikap diri.
“Kitai enda ulih semina berani ngatur pengawa ba renggat nengeri aja. Kitai mesti ulih ngatur pekit tikas dunya. Semina nengah chara tu aja kitai ulih ngayanka Sarawak udah datai ba tikas sebuah nengeri ti nyadi kuasa besai dalam lumba enggau main di Malaysia,” ku iya.
Ba edisyen ke-21 SUKMA, Sarawak mujur ngempu gelar champion enggau pengelebih siti emas ngalahka Wilayah Persekutuan.
Kontinjen Sarawak mujur bulih 76 midul emas, 55 midul pirak enggau 70 midul engkeraju. -TVS
