SELANGAU 22 Feb: Pengani Rumah Lanting diatu udah ulih ngasaika pengidup ti lebih lantang pengudah pindah ngagai rumah panjai baru ti digaga ngemeratka sukut pengelikun.
Menteri ba Opis Premier Sarawak, Dato Sri John Sikie Tayai muji pemujur tu sereta ngaku pengepuh Komiti Pemansang enggau Pengelikun Genturung Pendiau (JKKK) Rumah Lanting Ulu Arip dalam bejalaika pengawa ngentak rumah panjai nya ti lebih likun.
Nampung penerang ari Unit Kominikasyen Perintah Sarawak (UKAS), iya mega ngelalau pengani rumah panjai senentang pemesai guna pengelikun dalam pengawa ngentak rumah panjai baru nya.
“Rumah panjai baru patut ngemeratka sukut pengelikun. Ambika chunto, baka ba Rumah Lanting tu, batu bata patut ditusun nyentuk ke atap ngambika api enda ngerekai enti nyema bisi penusah angus nyadi,” ku iya.
Maya bejaku ba Pengerami Gawai Mangkung Tiang Rumah Lanting kemari, John Siki mega bisi ngenang penusah angus ke nyadi kena 19 Februari 2020 ti nganguska Rumah Lanting ke lama pemanjai 18 pintu nya.
Nya alai, iya ngelalau pengani rumah panjai ba dia ngambika bela mantu meranakka puku dalam aspek pengelikun , laban nya ulih nyeliahka pengerugi ke besai agi jemah.
“Taja pan tu engka nyerangkung kos tambah ngaga rumah nyentuk RM1,000 ngagai RM3,000, tang nya ulih nyelamatka rumah kitai ari napi mayuh agi pengerugi,” ku iya.
Kelimpah ari nya, Kaban Kunsil Nengeri (ADUN) Kakus nya mega nangkan pengani ba rumah nya ngambi nentuka pengawa nyambung wayar elekterik dipejalaika orang ke bisi setipikit sereta diaku raban SESCO dikena nyeliahka penusah ke enda disadang nyadi.
Ba pengerami nya, iya mega bisi meri geran Projek Mit Menua Pesisir (MRP) sepenyampau RM20,000 ngagai JKKK Rumah Lanting enggau Rm5,000 ungkup Biro Indu Rumah Lanting dikena mantu ngatur enggau ngemansangka komuniti.-TVS
