KUCHING, 22 Feb: Opis Tanah enggau Survei (JTS) Sarawak nempa pemujur ti ngemegahka ati pengudah bulih anugerah tiga emas bagi kategori Public Service Innovation Asia (PSIA) ba Malaysia Technology Expo (MTE) 2025 ke diatur ba Palan Dagang Dunya, Kuala Lumpur, kemari.
Nitihka penerang JTS, tiga anugerah emas tu diulih nengah projek inovasyen Smart Patrol ari JTS Bagi Menua Mukah,Retrace oleh JTS Sri Aman, enggau i-Telcos (Intelligent Application of Telecommunication Tower System) asil inovayen JTS Samarahan.
Nangkan ke nya, siti agi projek inovasyen, SARCOM (Sarawak Control Monument) ari JTS Kapit mujur mai pulai anugerah pirak.
Anugerah PSIA tu disuaka Sapit Sekretari Perintah Sarawak (Operasi), Datu Hii Chang Kee.
“PSIA betuju nyadi pantar bagi sektor perintah mantaika inovasyen dalam ejensi, kelimpah ngaku enggau mantu ngangkatka penyikar sereta kualiti servis ngagai rayat nengah pengawa nguna teknologi pemadu baru,” ku iya nengah siti penerang.
Kelimpah pemujur ba renggat nasional, keempat projek nya mega bulih anugerah khas ari institusyen inovasyen antarabansa ti nyadi pengaku penyulut pemansang projek inovasyen sida.
Projek i-Telcos nerima Anugerah Khas ari Haller Pro Inventio Foundation, Poland , SARCOM nerima Anugerah Khas ari Toronto International Society of Innovation and Advanced Skills (TISIAS), Kanada, projek Retrace nerima Anugerah Khas ari Japan Intellectual Property Association (JIPA), Jepun enggau projek Smart Patrol nerima Anugerah Khas ari International Federation of Inventor’s Association (IFIA).
Bisi 20 raban pemandang ari mayuh bengkah ejensi perintah besai enggau nengeri serata Malaysia ngambi bagi dalam kategori PSIA di MTE 2025, enggau lebih ari 20 projek inovasyen bisi dipertandingka.
Pemujur JTS Sarawak tu ngayanka penau ejensi perintah nengeri dalam ngasilka inovasyen ti bekualiti tinggi lalu ngembuan daya semekih ba renggat antarabansa.-TVS
