𝗚𝗘𝗢𝗥𝗚𝗘𝗧𝗢𝗪𝗡, 16 Feb: Ejensi Penerit Adat Maritim Malaysia (APMM) deka ngerembaika pengawa masang Sistem Pematau Tasik (SWASLA) ngagai kandang tasik di Pantai Timur Semenanjung enggau Sarawak dikena ngemanah agi sistem pematau Maritim menua.
Menteri Dalam Menua Datuk Seri Saifuddin Nasution Ismail madah, sistem nya deka diengkah ba endur ke strategik iya nya palan tumpuk angat jenayah Maritim baka pengawa mai barang tama belalai, dadah, migran enggau aktiviti penyelawai.
Iya madah sistem radar ngena teknologi tinggi enggau sistem pematau terus deka nambahka agi penyikar raban penerit adat ba kandang tasik menua.
“Jam ke diatu, ngambika bala bakih media sama nemu bisi dua zon SWASLA ti dibuka, siti SWASLA Lumut iya nya matau kandang tasik Selat Melaka lalu kedua SWASLA Sabah iya nya matau kandang tasik Pantai Barat Sabah.
“Kitai mega deka ngerembaika pengawa (matau) ngena dron enggau ‘unmaned aerial vehicle tauka UAV dikena matau kandang tasik ke pedis deka dilawa,” ku iya.
Iya mansutka pekara nya maya aum media Program 20 Taun Ejensi Penerit Adat Maritim Malaysia (2DMM) ba Kapal Layar Karpal Singh, ditu kemari.
Saifuddin Nasution madah sepenyampau RM675 juta udah diagih ngagai APMM nengah Bajet 2025 ungkup ngemanahka keresa ke udah bisi enggau meli keresa baru nyengkaum Program Nyambung Timpuh Nguna Kapal (SLEP).
Ungkup enam kapal ke udah bisi, pengawa meli kapal misyen mayuh guna (MPMS) enggau dua kapal Pematau Generasyen Baru (NGPV).
Kelimpah ari nya, iya mega madah pengawa meli empat buah helikopter Agusta Westland 189 taun siti nyin ila deka nambahka agi pengulih pengawa matau ari langit ba kandang endur ke strategik lebih agi ba menua Sabah enggau Sarawak.
Maritim Malaysia sehari tu ngerami taun ke-20 penumbuh iya lalu nungkatka rambai jaku ‘Dua Puluh Taun Maritim Malaysia, Terabai Tasik Menua’.
Pengerami tu diatur berengkah 14 nyentuk 16 Februari lalu mandangka bemacham program baka pengawa meresa Armada Keresa Maritim, Karnival Maritim Perkasa (KMP), Pengawa Baris Rasmi, Demonstrasyen Penyelamat enggau Tim Pengereja Pengawa Khas enggau Penyah Penusah (STAR Team) sereta eksibisyen pengawa puang.-TVS
