KUCHING, 16 Feb: Mandal Presiden Parti Pesaka Bumiputera Bersatu (PBB) ungkup Sayap Bumiputera diatu diiring orang baru enggau lama.
Tu pengudah Datuk Ibrahim Baki, Dato Sri Julaihi Narawi, Datuk Dr Annuar Rapaee enggau Datuk Len Talif Salleh menang ba pengawa bepilih ngerebut penuduk nya nyerumba Aum Besai PBB Ke-16 ke diatur ba Palan Konvensyen Borneo Kuching (BCCK), Hari Enam.
Undi pemadu tinggi diulih Ibrahim iya nya 910 undi, ditangkan Julaihi (902 undi), Dr Annuar (786 undi) enggau Len Talif (687 undi).
Dua agi chalun ke mega penyandang, Dato Sri Abdul Karim Rahman Hamzah semina bulih (669 undi) enggau Datuk Dr Abdul Rahman Junaidi (546 undi), ngujungka seduai bela puntan ngetanka penuduk nya.
Pemutus nya mega ngayanka bisi tuai baru ke deka mantu negapka kuing tuju parti dalam negika hak Bumiputera Sarawak.
Pengawa bepilih dalam parti nya diatur enggau chukup berurun sereta manah, lalu penatao raban deligit ari selampur nengeri miloh ketuai ke pemadu manah ungkup ngiring parti.
Konvensyen PBB Ke-16 mega ngemataka pengawa bepilih Kaban Supreme Kaunsil PBB ari sayap Bumiputera enggau Pesaka, lalu penuduk pemadu tinggi parti mengkang enda diperebut.-TVS
