KUCHING, 15 Feb: Parti Pesaka Bumiputera Bersatu (PBB) sempama sebuah kapal besai ke dikemudi jeragan ke kering, tebilang sereta timpai runding ke jauh sereta berani ngaga pemutus, ku Datuk Amar Douglas Uggah Embas.
Kenu ku Sapit Presiden parti PBB Sarawak nya, tuai baka Datuk Patinggi Tan Sri Abang Johari Tun Openg ngembuan pengulih neruska pengawa ngiring parti ngambika terus tegap enggau mengkang relevan.
“Kami deka seruran nyukung iring Abang Johari enggau nentuka iya enda gawa kediri,” ku iya.
Uggah ke mega Sapit Premier Sarawak mansutka penemu nya maya Pengawa Bejadika Aum Besai ke-16 Parti Pesaka Bumiputera Bersatu (PBB) ba Palan Konvensyen Borneo Kuching (BCCK) ditu, sehari tu tadi.
Ku terang Uggah, rayat Sarawak temegah ulih meda empas pemansang ke majak berupai ba Tanah Kenyalang.
“Semua tu endang asil digaga parti PBB Ke nyadi parti pemadu manah enggau mayuh nulung Sarawak kenyau iya ditumbuh,” ku iya.
Ku tandu iya, pengawa nyapai semua pemujur ngelama tu ukai sekelip mata baka sempama jaku ‘yang bulat tidak datang bergolek, yang pipih tidak datang melayang’ (iya ke segala enda datai begaring, iya ke mipau enda datai terebai).
“Nya alai, kitai ari semua 82 pampang parti PBB selubang penemu ngetanka penuduk Abang Johari ke nyadi Presiden parti PBB Sarawak enda ibuh betanding ungkup penggal 2025-2027,” ku iya. – TVS
