KUCHING, 15 Feb: Kaban Parti Pesaka Bumiputera Bersatu (PBB) mesti pintar nguna teknologi pemadu baru nyengkaum pemintar tempa (AI),ku Datuk Patinggi Tan Sri Abang Johari Tun Openg.
Presiden PBB nya madah, pekara nya beguna amat dikena nentuka AI enda disalah guna ungkup agenda politik.
“PBB mesti sedia nguna AI laban teknologi AI deka nempa mensia hibrid antara manusia enggau mesin. Iya ke dikenangi aku AI dikena dalam politik ungkup tuju propaganda.
“Kekadang mensia kelalu nitih pengasai ati ngena aja utai dikena ngulihka kuasa.
“Enti pekara nya nyadi sempama baka lunga dikena munuh.
“Nyadi tuai dudi hari mesti nemu baka ni deka mutarka teknologi AI tu,” ku iya.
Iya ke mega Premier Sarawak mansutka penemu nya rambau Pengawa Bejadika Aum Besai Ke-16 Parti Pesaka Bumiputera Bersatu (PBB) ba Palan Konvensyen Borneo Kuching (BCCK) ditu, pagi tadi.
Nerang silik, Abang Johari madah, Sarawak ngembuan penau dalam ngemansangka pelasar AI, kelimpah muka peluang baru ungkup pemansang ekonomi enggau pemansang raban bansa.
“Sebedau tu Presiden Amerika Syarikat Donald Trump madah sida sigi enda ngeluarka chip ngagai China. Udah nya, China mansutka chip diri empu lalu ngemansangka pantar AI dikumbai DeepSeek.
Nyadi, aku madah Sains, enti China ulih nama salah kitai (Sarawak) ngaga DeepSar laban tu semua dikuasa chip. Tambah mega diatu 100 iku anak Sarawak ulih ngaga chip,” ku iya.
Taun nyin kemari, Serikat penengkebang chip semikonduktor lokal, Sarawak Microelectronics Design (SMD) mujur mansutka urung 100 iku injinir dalam bidang tempa tukuh Chip.
Ku Abang Johari, ekonomi Sarawak begunaka pengawa ngaga chip ke ulih dikena nyungkak ekonomi enggau nyelinting menua rantau Asia nyadi makit besai. – TVS
