KUCHING, 13 Feb: Pengawa meri darah endang beguna amat ngagai mensia mayuh, tebal ngagai orang ke begunaka darah.
Taja pia, agi bisi pemar ke ditapi perintah dikena nentuka peminta bekal darah di Sarawak chukup.
Pengawa meri darah beguna amat ngagai mayuh pesakit ba sepital, nyengkaum Sepital Besai Sarawak (HUS), ti begunaka bekal darah ke chukup ninting hari dikena nangkup guna pesakit.
Nitihka Tebangkar Perubat Transfusyen HUS, Dr. Wong Yi Shen, peminta darah di Sarawak majak nambah ninting taun.
Ba HUS aja , lebih kurang 70 nyentuk 80 pain darah diguna ninting hari dikena nangkup peminta pesakit ari bemacham enggau situasyen.
“Peminta darah ba Sepital Besai Sarawak, kitai begunaka abis nadai 70 pain darah sehari. Tang, kitai meda nya udah nambah kenyau ari taun nyin kemari. Kadang iya ulih manggai 80.
“Ungkup Sarawak, kitai lebih kurang 500 tauka 600 pain darah diguna ungkup sehari,” ku iya.
Ninting taun, beribu iku pesakit ba sepital di sarawak begunaka bekal darah dikena pengawa bebuntas, berubat penyakit riman, kes bebadi jalai raya, enggau penyakit bukai.
Taja pia, agi bisi pemar ke ditapi tetiap sepital di Sarawak dikena nangkup peminta tu.
Dr. Wong nerangka, darah bansa “O” suah napi suntuk bekal darah laban ulih dikena ungkup semua bansa darah, nyadika bansa darah nya chukup beguna amat maya penusah ngenyit nyadi.
“Engka, dalam sehari, darah bansa O deka nerima mayuh peminta darah. Enti bisi penusah ngenyit, eksiden tauka sebarang penusah ke begunaka darah.
“Selalu iya kitai enda sempat deka meresa darah nya. Udah nya, lutur ba wad engka minta darah bansa O enggau plasma AB,” ku iya.
Empai lama tu tadi, Sepital Besai Sarawak (HUS) bisi mansutka penerang senentang penanggul suntuk darah bansa “O”, ke alai bisi dua kes Upper Gastrointestinal Bleed ti balat raya.
Pesakit nya lenyau nyau ka semak dua liter darah lalu begunaka 60 pain darah dikena berubat.
Berindik ari nya, perintah Sarawak nengah Opis Menteri Pengerai Mensia Mayuh, Pengawa Berumah, enggau Perintah Lokal Sarawak udah nyendiaka turu dikena nangkup peminta bekal darah ba tetiap sepital.
“Opis Menteri Pengerai udah ngeluarka belanja dikena meresa penyakit HIV enggau hepatitis. Nyadi dikena bejalaika pengawa tu ukai pechuma.
“Reti iya, kitai begunaka duit dikena bejalaika proses tu ngambika darah ke diberi ngagai orang dijamin beresi,” ku iya.
Nya alai, Dr. Sim ngelalau komuniti ngambika bela meri darah lalu nyadika nya sebagi ari gaya pengidup bepengerai enggau tanggungpengawa rama.
“Nyadi kami ngelalau mensia mayuh datai meri darah ngambika kita ulih mantu sepital nyelamatka pesakit di sepital Sarawak ti begunaka darah,” ku iya.
Pengawa meri darah ukai semina tanggungpengawa rama aja, tang mega tangkup pengawa genap iku kitai dalam komuniti.
Meri darah mega ulih nyelamatka nyawa mensia bukai, tebal agi maya berubat.
Nya alai, pengawa baka tu endang ulih ngerapitka kaul rama, ngemanahka pengerai mensia seraya ngayanka penyiru ngagai komuniti.-TVS
