KUCHING, 13 Feb: Parti Pesaka Bumiputera Bersatu (PBB) terus mengkang relevan dalam dunya politik Sarawak ketegal polisi penyerakup ti dikemeranka dalam parti nya.
Sapit Presiden PBB, Datuk Amar Douglas Uggah Embas madahka, tu nyata dipeda nengah polisi ti progresif sereta penyerakup raban PBB ti seruran ngemeratka prinsip selubang sepenemu dikena negapka politik.
“Dalam PBB, kitai ngemeratka seati penemu entara Pesaka enggau Bumiputera.
“Nya alai, pemereti ati enggau saum penemu tu udah lama dikemeranka kenyau ari suba. Tu resia enggau resipi pemujur kitai laban Pesaka bisi rintai ketuai kediri empu baka nya mega Bumiputera.
“Nyadi, nadai bisi penyarut entara kedua-dua parti tu,” ku iya.
Uggah ke mega Sapit Premier Sarawak madah munyi nya ba sebengkah Randau Khas beserimbai Aum Besai PBB Ke-16 ditu, kemari.
Uggah nyemetak madahka, pemujur PBB mega ketegal iring ketuai ke ulih dikearap ti diariska ari ketuai ke dulu suba.
“Tang PBB mengkang tegap, lalu nyentuk ke sehari tu PBB majak tegap.
“Nyadi, tu bisi kebuah enggau formula. Siti ari formula tu iya nya kitai endang bisi ketuai ti tegap kenyau ari parti tu ditumbuhka,” ku iya.
Kenyau ditumbuh dalam taun 1973, PBB mengkang tegap nyentuk ke sehari tu taja pan betapi enggau bemacham pemar sereta penumbuh parti politik bukai.-TVS
