NEW DELHI, 13 Feb: Kaul antara Malaysia enggau Turkiye dipelaba deka terus ngerembai ungkup taun-taun ti deka datai, bekau ari pemerat bela begunaka sukung ari pangan diri, ku pemikir politik Turkiye.
Penemuai Presiden Turkiye Recep Tayyip Erdogan ke Malaysia minggu tu tadi meri empas baru ngagai kerejasama ke majak ngerembai mungkur sekeda bidang, ku tebangkar kaul antarabangsa Mustafa Oztop.
Penemuai nya nandaka kaul kededua menua deka masuk siti jeman ke pemadu manah.
Ku terang Oztop, tanggungpengawa Turkiye nyadi pengempung dunya Islam sereta peneleba dalam industri penyaga menua, diplomasi, pengerai enggau pengangkut disengkaum enggau pengulih intelektual Malaysia dala, bidang Islam, sains, teknologi enggau ekonomi ulih ke meri bantu ngagai pemansang enggau pengelantang kededua menua.
Nangkan ke nya, profesor madya ba pekara antarabangsa ke mega pemikir politik Ibrahim Karatas madahka taja pan takah menua Malaysia enggau Turkiye chukup jauh tang kededua menua bekunsi visyen ti senutuk enggau juluk dudi hari.
Ku terang Karatas pemanah kaul sereta kerejasama rat antara kededua menua, nyengkaum dalam isu Palestin, Islamofobia, hak mensia, krisis dunya sereta sereta bemacham inisiatif dibaruh Serakup Kerejasama Islam (OIC) enggau Gerup Lapan Menua Mansang (D-8).
Pemanah kaul enggau Malaysia mega seriris enggau inisiatif “Asia Anew” ke dipenyadi Turkiye taun 2019 dikena ngegapka kaul diplomatik, ekonomi enggau menua-menua di Asia.
Sektor penyaga menua nyendiaka peluang besai ungkup kerejasama kelimpah pengawa dagang, pekara pelajar enggau betukar rayat.
Ku tandu Karatas, kerejasama nya chukup beguna ukai semina nyadi pilih tang nyadi pekara ke chukup beguna ngagai kededua menua ke selubang penemu.
Ba sebengkah penerang kunsi Hari Dua, Malaysia enggau Turkiye nyemetak madahka kerejasama penyaga menua ke betuju nambahka pengering enggau negapka ekosistem nyaga ekonomi kunsi.
Taun 2024, Turkiye endang bakih dagang ketiga pemadu besai Malaysia, palan ekport besai enggau penatai import pemadu besai dalam menua Asia Barat, lalu Malaysia nnyadi bakih ekonomi besai Turkiye dalam rantau ASEAN.
Kededua menua nyelinting deka nambahka rega dagang ke manggai penyampau RM24.13 bilion (US$5.28 bilion) taun nyin kemari.
Kaul diplomatik Malaysia -Turkiye diangkat nyadi Atur Kunsi Strategik Komprehensif (SCP) kena Julai 2022.
Maya bejaku ba sebengkah aum media begulai enggau Anwar maya penemuai nya, Erdorgan madahka kaul antara rayat Turkiye enggau Malaysia udah ditanggam kenyau bepuluh taun pengelama, lalu kededua menua deka berundingka pengering ari sejarah kunsi ke chukup panjai sereta nitihka singkang pengawa ke udah dirandang bala tuai kelia.-TVS
