KUALA LUMPUR, 13 Feb (Bernama) — Lebih 93 peratus ari 224,403 konten judi dipadam ari bemacham pelasar dalam tali arus iya nya ari Facebook, ti beratika pelasar media rama nya nyadi lubuk iklan judi.
Menteri Komunikasyen Fahmi Fadzil madahka Diwan Rayat sehari tu, penyampau nya mungkur 209,006 konten judi ari taun 2022 nyentuk 1 Februari tu tadi.
“Komiti Komunikasyen enggau Multimedia (MCMC) chakah bejalaika pengawa matau dikena nentuka pelaman internet di menua tu beresi ari konten dalam tali arus ke ngelanggar undang-undang, nyengkaum konten judi dalam tali arus,” ku iya maya sesyen betanya saut di Diwan Rayat sehari tu tadi.
Iya madah, 5,026 laman web judi udah disekat nengah kerejasama penyendia servis Internet ungkup timpuh ke sama.
Raban MCMC dibaruh bidang kuasa Akta Komunikasi dan Multimedia 1998 (Akta 588) ku iya, komited meri kerejasama ngagai PDRM ari sukut madamka konten media rama, nyekat laman web enggau bantu teknila dikena ngerumban proses pansik bekaul enggau penyalah judi dalam tali arus.
Iya mansutka pekara nya maya nyaut tanya ari Azahari Hasan (PN-Padang Rengas) pasal atur opis menteri munaska aktiviti judi dalam tali arus ke majak balat di media rama.
Fahmi madah dikena nentuka ekosistem rentayan internet ke lebih likun enggau meruan, MCMC udah ngasuh genap servis media rama enggau pesan nengah internet ngembuan abis nadai lapan juta penguna berijester di Malaysia minta Lisin Kelas Meri Servis Aplikasyen, berengkah 1 Januari 2025.
Iya madah atur nya betuju dikena nentuka raban penyendia servis pesan internet enggau media rama berejister nitihka atur dibaruh Akta 588 sereta mekuhka Kod Tatalaku (Amalan Terbaik) dikeluarka MCMC.
Fahmi madah, nya deka ngangkatka akauntabiliti bekal enggau konten sereta interaksi dalam tali arus ke disedia ngagai bala penguna.-TVS
