SELANGAU, 10 Feb: Sekula ti balat rusak ketegal penusah bah ba sitak Kunsil Nengeri (DUN) Tamin dikearapka diberi perati lengkas ngambika pengawa sekula ti deka dibuka enda lama agi ulih bejalai enggau lanchar.
Kaban Kunsil Nengeri (ADUN) Tamin, Ir Christopher Gira Sambang madah diri udah ngansak raban bekaul meri bantu lengkas ngagai sekeda sekula di Tamin ke balat tebunsa iya nya Sekula Primari (SK) Ng Kua Selangau, SK Ng Selangau enggau SK Pelugau.
“Aku udah mantaika isu sekula ke tekeruga ketegal penusah bah di Tamin ngagai raban ke bekaul.
“Kebendar, aku udah berandau enggau Sapit Menteri Pelajar, Inovasyen enggau Pemansang Bakat Sarawak, Datuk Dr Anuar Rapiee enggau tuai PPD Selangau ngambi berundingka chara dikena mutarka penanggul tu,” ku iya nengah penerang ke dibantai ba laman Facebook DUN N.559 Tamin sehari tu tadi.
Tandu Gira, rintai reta tengkira ke rusak enggau peminta ngangkatmanah begunan ke rusak ba sekula nya udah dikenataika PPD Selangau ngagai Opis Pelajar Nengeri Sarawak (JPNS).-TVS
