KUALA LUMPUR, 10 Feb: Opis Menteri Penyerakup Menua (KPN) deka terus negapka pengawa dalam nambahka penyedar enggau pemereti pemesai guna penyerakup ba rayat Malaysia nengah program ti inklusif.
Menteri ti nguasa opis menteri nya, Datuk Aaron Ago Dagang madahka, opis iya deka seruran nentuka penyerakup di menua tu terus dijaga enggau ngambi kira bemacham etnik, budaya enggau pengarap ti nyadi kunchi penegap menua tu.
Aaron nengah siti penerang madahka, ba taun 2024 , KPN udah bejalaika 730 program ti nyerangkung kluster Semarak Perpaduan, Semarak Kenegaraan enggau Komuniti Rahmah.
Program tu dipejalai betuju nyadi taba integrasyen nasional ti ulih nambahka interaksyen entara rayat Malaysia ti ngembuan bemacham bansa enggau jalai pengarap.
Iya mansutka jaku nya dikena nyaut sanding penemu, perambu enggau jaku ti dipansutka Direktor Asia Universiti Tasmania Prof Dr James Chin bekaul tikas KPN.
Bekaul enggau pekara ngatur isu penyerakup, Aaron madahka raban iya udah numbuhka komiti pengatur isu penyerakup (JPIP) ba taun tu ti bechairmanka Tuai Sekretari Opis Menteri Penyerakup Datuk Seri Hasnol Zam Zam Ahmad dikena mansik kesemua insiden tauka isu penyerakup ke nyadi di menua tu.
“Penumbuh JPIP tu deka mantu KPN bejalaika atur jampat dalam meri timbal enggau lalau ngagai rayat Malaysia. Aum keterubah JPIP udah dipejalaika ba bulan Januari ke udah,” ku iya.
JPIP ngaul pengari KPN, Kaunsil Pengelikun Menua, Opis Menteri Dalam Menua, Polis Diraja Malaysia, Opis Menteri Komunikasyen, Komisyen Komunikasyen enggau Mulitimedia, Opis Menteri Pengawa Berumah enggau Perintah Lokal sereta Opis Menteri Pelajar.
Kelimpah ari nya,JPIP mega dipasuk Palan Serantau Asia Tenggara Dikena Nagang Ulah Kasar (SEARCCT), Opis Menteri Nembiak enggau Lumba, Opis Pemansang Islam Malaysia , Institut Kefahaman Islam Malaysia enggau sekeda raban akademik.-TVS
