MIRI, 9 Feb: Bangkai siku lelaki ke apin dikelala identiti ditemu mensia mayuh ba sebuah parit enda jauh ari kedai besai Emart Tudan, ditu lemai kemari.
Tuai Balai Bomba enggau Penyah Penusah (BBP) Lutong, PBT II Henry Jugah madah, raban sida nerima kangau emejensi urung pukul 5.32 lemai bekaul enggau pekara nya.
Berindik ari nya, seraban bomba udah digerah ngelawa palan penusah urung 7 kilometer ari balai.
“Seninjik datai ba endur nya, raban kami meda amat bisi siku orang dalam parit. Sepengudah dikemendarka polis, operasyen ngatung tudah ngagai endur ke likun dipejalaika,” ku iya nengah sebengkah penerang.
Udah nya, bangkai tudah lelaki nya diserah ngagai raban perubat ungkup pekara ke bekaul.
“Urung pukul 6.30 lemai, raban KKM ngenukuka tudah lelaki nya amat udah mutus seput lalu bangkai diserah ngagai raban polis,” ku iya.
Naka berita tu ditulis identiti lelaki ke midang nya empai dikelala laban nadai tetemuka sebarang dokumen ba tubuh tudah.-TVS
