KUCHING, 8 Feb: Perintah Sarawak deka nyain Sempekat Jual Beli (SPA) begulai enggau Serikat Penerebai Bilun MASwings Sdn Bhd (MASwings) kena 12 haribulan dua tu, ku Dato Sri Abdul Karim Rahman Hamzah.
Menteri Dagang Temuai, Industri Kreatif enggau Seni Pemerindang Sarawak nya madahka, pengudah pengawa nya mujur disain, MASwings deka muka sekeda penerebai antarabansang terus nyengkaum penerebai baru ngagai sekeda kandang menua di Indonesia.
“Ngarapka taun tu, bulan tu kebendar iya, kena 12 Februari tu perintah Sarawak deka ngambi (MASwings), lalu deka bisi bilun kediri empu tauka airline sida empu.
“Kena 12 Februari tu kitai deka ngambi MASwings. Entara sekeda destinasyen ke udah dikelala iya nya sekeda destinasyen ti wilayah Indonesia,” ku iya.
Abdul Karim mansutka jaku nya rambau Pengerami Malam Program Borneo Cross Border Cycling Tour 2025 ditu malam tadi.
Iya madah, serikat penerebai bilun nya deka ngetanka arung penerebai ke udah bisi di Sabah enggau Sarawak sebedau numbuhka penerebai bilun ke baru luar Sarawak nyengkaum Semenanjung Malaysia.
“Kitai sigi enda tinggal kaul entara Sarawak-Sabah enggau Semenanjung tang berindik ari airline nya, dipelaba dudi hari ila deka ngerembai besai nyadi siti airline ti ngaul mengeri enggau mega mengeri besai ba kandang menua Nusantara tauka Asia Tenggara enggau pengudah nya mengeri-mengeri besai ke bukai di dunya.
“Premier Sarawak pan bisi nyebut pasal Korea, Jipun, Thailand, Timur Tengah enggau Eropah tang nya deka ngambi timpuh enggau nama pekara ti diperambu ungkup padang bilun kitai empu tu.
“Nya nya deka mansang ngerembai begulai,” ku tandu iya.
Kena 13 Januari tu tadi, Premier Sarawak, Datuk Patinggi Tan Sri Abang Johari Tun Openg madahka, aum ngambi serikat penerebai bilun ti diempu Malaysia Aviation Group (MAG), udah diputuska.
Ku iya, pengawa nyain SPA entara Perintah Sarawak enggau MAG dijangka diatur dalam bulan tu di Kuching, ditangkanka enggau pengawa mantaika nama baru serikat penerebai bilun nya.-TVS
