KUALA LUMPUR, 7 Feb: Perintah Sarawak udah ngemendarka peminta lisin ungkup Zecon Bhd nyendiaka bekal kuasa solar dibaruh Ordinan Elektrik Sarawak ngagai Taman Teknologi Gadung Kota Petra (KPGTP) di Kuching.
Lisin pengelama 30 taun nya diteritka berengkah 5 Februari tu tadi enggau bayar panjar RM300,000 setaun.
Lisin nya deka meri hak bekaul enggau perambu, ngaga, masang, nguna, bejalaika kelimpah ngatur sistem fotovoltan solar (PV) ungkup mekalka kuasa solar ngagai kandang endur 3,000 ikar pemesai di sitak menua Salak, Kuching.
“Tu mega mungkur pengawa nganjung enggau ngidar kuasa karan nyengkaum dalam tali arus, tower enggau sambung tali karan ngagai penguna ukai domestik dibaruh lisin nya,” ku iya.
“Nya mega mungkur pengawa masang loji kuasa 300 megawatt, sistem modul solar PV, unit bepelasarka arus penikal, penchawang ngubah enggau kereja-kereja bekaul enggau karan dikena nyendiaka kuasa solar ngagai penguna ukai domestik ba kandang endur ke udah dirintai,” ku iya.-TVS
