Engkilili, 6 Feb: Komuniti China lebih agi ke diau ba sitak Kunsil Nengeri (DUN) Engkilili diperansang terus bekerejasama enggau pengari rayat Gabungan Parti Sarawak (GPS) dikena neruska pemansang ba pelilih tu.
ADUN Engkilili Dr Johnical Rayong Ngipa madah pekara nya beguna amat ngambika agenda pemansang ke udah dilanggur perintah ulih bejalai enggau lanchar ke pemaik rayat mayuh.
“Nyadi kitai di Engkilili, rayat patut terus bekerejasama enggau aku ke nyadi pengari rayat GPS, nya beguna amat dikena neruska pemansang ba pelilih Engkilili ngagai siti tikas ke lebih manah ba sukut pemansang infrastruktur baka jalai raya enggau bukai.
“Semua nya enda ulih dikemujur enggau dikeamat enti nadai kerejasama penuh ari tuai enggau rayat, kitai enggai meda bisi penyarut,” ku iya.
Dr Johnical mansutka penemu nya maya Pengerami Rumah Tebuka Taun Baru China diatur Gerempung Hakka Engkilili ditu, kemari.
Tandu iya, iya naka ulih adil sereta enda ngira penatai tauka penemu politik sapa-sapa dalam bejalaika pengawa nyadi pengari rayat lebih agi dalam magi Projek Mit Pemansang Menua Pesisir (MRP) tauka Projek Transformasyen Menua Pesisir (RTP) di Engkilili.
“Semua tu ungkup pemansang Engkilili ngambika terus mansang baka pelilih bukai di Sarawak,” ku iya.
Berebak enggau nya iya muji penyerakup ke udah ditunjukka komuniti di Engkilili ke ulih berami sama baka diri sebilik enda ngira nya Iban, China enggau Melayu.
Udah nya, Dr Johnical bisi nyuaka tulung nengah MRP sepenyampau RM35,000 ungkup Biro Indu, Nembiak enggau Gerempung Hakka Engkilili.
Kelimpah ari nya, agih sepenyampau RM200, 000 diberi nengah Projek RTP 2025 ADUN Engkilili ungkup Tua Pek Kong enggau Funeral House Servis Engkilili dikena ngemanah agi perengkaguna ba dua bengkah organisasyen nya.
Sama bisi datai Chairman Gerempung Hakka Engkilili, Jee Jan Nam enggau bala tuai raban bansa ke diau besemak.-TVS
