ENGKILILI, 3 Feb: Raban bekaul dibaruh Ejensi Pemansang Bagi Menua Sri Aman (SADA) dipinta lengkas ngemujurka projek ngemanah sistem parit ba sepanjai Jalai Tanjung Lipat ke Lidong, Skrang ditu.
Kaban Kunsil Nengeri (ADUN) Engkilili, Dr Johnical Rayong Ngipa madah, pengawa ngemujurka projek nya chukup beguna dikena mutarka penanggul ampuh bah ke suah nyadi tiap kali musin landas tauka ujan bangat.
“Seminggu tu endang siti penyadi ke enda manah untung menua kitai di Engkilili, nyadi penusah tu nyadi ninting taun tiap kali ujan (bangat) endang kena ampuh.
“Aku meda tadi tu bekau ari penanggul sistem parit.
“Nyadi aku minta raban perintah lebih agi Ejensi Pemansang Bagi Menua Sri Aman (SADA) patut lengkas bejalaika projek ngemanah sistem parit ditu baka ke udah dikemendar laban agih belanja endang udah bisi,” ku iya.
Dr Johnical mansutka penemu nya pengudah nyuaka bantu 266 piket pemakai rangkai ngagai lima buah rumah panjai enggau sebuah sekula ke tebunsa ampuh bah di Engkilili kenyau Hari Enam ke udah.
Tandu iya nadai kebuah projek nya betangguh laban agih belanja ungkup projek nya endang udah dikemendarka sebedau tu.
“Agih belanja udah bisi ari SADA ungkup tiga renggat, nya kebuah aku minta projek tu digaga lengkas ngambika penanggul ampuh bah ditu ulih teputar,” ku iya.
Antara rumah panjai enggau sekula ke bisi nerima bantu barang pemakai nya SK Tabut, Rumah Jangin Sarie, Kejemut, Rumah Landan, Rumah Jerukan, Rumah Harry enggau Rumah Karin di Tabut, Skrang.
Sama bisi datai Pegawai Penyaga Orang Periman Pelilih Lubok Antu, LT(PA) Desem Samuel, Pegawai Pengintu Pengelantang Raban Bansa Bagi Menua Betong, Abdul Shamat Kassim, Tuai Balai Polis Skrang Sarjan Mohd Suffian Abdullah enggau Pegawai Bomba Kanan (I) ari Balai Bomba enggau Penyah Penusah (BBP) Betong, Muhammad Fhazil Abang Abdul Manaf sereta ke bukai.-TVS
