MIRI, 3 Feb: Pengawa matau pengerai enggau perati ngagai pengelantang emosyen orang tasah bah ba tetiap Palan Pengenduh (PPS) patut diberi perati tebal agi lebuh napi situasyen penusah ngenyit.
Menteri Pemansang Orang Indu, Anak Mit enggau Pengelantang Komuniti, Dato Sri Fatimah Abdullah madahka, atur tumu mesti dipejalaika dikena nentuka pengerai orang tasah seruran dijaga ngambika sida enda kena risiko timpuh panjai.
“Kami mega deka nentuka ari sukut pengerai. Kami bisi raban lutur enggau indu misi ditu. Ba tetiap palan pengenduh, kami bisi raban pengereja pengawa.
“Nyadi, kami semina ninga ripot ari lutur. Ambika chunto, bisi ke tabin, bisi batuk, bisi ke sakit chirit bisi ke hipertensyen. Penyakit baka tu ulih diubat lutur. Enti ba ditu, enda ibuh ngagai sepital,” ku iya.
Iya munyi nya sepengudah ngabas ngagai PPS Kampung Pujut Tanjung Batu di Miri, Hari Minggu tu tadi.
Berebak enggau nya, iya nyemetak madahka perengka guna anak mit ba PPS nyerangkung bekal ampin enggau tusu patut diberi perati nitihka peminta tetiap ruang bilik.
“Lebuh kami meri bantu ngagai orang ke tasah bah, kami meri bantu ngagai anak mit ari sukut ampin sereta mega tusu lalu nya bepelasarka peminta.
“Laban ari segi ampin, saiz iya bebida. Udah nya, ari sukut bansa tusu ke diirup anak-anak mit tu bebida. Nyadi tu bepelasarka peminta,” ku iya.
Tandu iya , dikena nyaga pengerai runding enggau emosyen nembiak mit, perintah chakah nyendiaka aktiviti ba PPS dikena ngurangka pengusut runding ke ditapi sida.
Naka ke diatu, di bagi menua miri, sepenyampau 1,138 iku ngenduh ba 12 PPS ti ngaul pelilih Miri, Subis enggau Beluru.-TVS
