KUCHING, 3 Feb: Sepenyampau 283 kes bebadi ba jalai raya dirikodka di Sarawak nengah Ops Selamat Ke-23 nyerumba pengerami Taun Baru China 2025.
Komisioner Polis Sarawak, Dato’ Mancha Ata madahka, penyampau nya mandangka penurun iya nya 59 kes enti dibanding enggau Ops Selamat Ke-21, ti ngerikodka 342 kes.
Iya nerangka, penusah bebadi ba jalai raya ba Ops Selamat tu nurun 17.3 peratus.
Mancha nyemetak madahka, kes bebadi ti nabanka nyawa tu ngerikdoka penurun 57.1 peratus, enggau semina tiga kes aja dirikod dibandingka enggau tujuh kes ba Ops Selamat Ke-21.
“Ari sukut bakal ba penguna pengangkut ke teparuk enggau penusah bebadi nya,bisi tiga iku tudah bebadi nyawa ke ngaul siku penguna mutosikal, siku deriba lori enggau siku pasinjir pengangkut 4 Wheel Drive.
“Tu ngujungka peratus sepenyampau 33 peratus dirikodka,” ku iya.
Tandu iya, kebuah penusah bebadi dalam Ops Selamat serak tu ketegal pengilap deriba entukar ti enda tebaikka entukar enggau manah lebuh deriba.
“Tu ketegal ari ulah mensia ti deriba ngelui ari tikas pengelaju lalu ngujungka tepelanting, belantak betunga mua sereta ngelantak begian belakang entukar bukai,” ku iya.
Sekumbang Ops Selamat Ke-23, bisi 3,804 saman udah dikeluarka ngagai penguna jalai raya ketegal mayuh macham penyalah trafik.
Ops Selamat Ke-23 dipejalaika kenyau 28 Januari nyentuk 2 Februari tu tadi dikena narak penemu mensia mayuh senentang atur trafik sereta ngurangka penusah bebadi, tebal agi maya musin pengerami.-TVS
