ASAJAYA, 3 Feb: Komiti Peyangga Penusah Ngenyit Nengeri Sarawak (JPBNS) udah nyikap diri napi penusah ampuh bah gelumbang kedua di nengeri tu.
Chairman JPBNS, Datuk Amar Douglas Uggah Embas madahka, raban iya deka seruran bejalaika pengawa matau enti nyema bisi kelai nyadi gelumbang kedua penusah ampuh bah.
“PBNS endang nyikap diri ba sebarang maya. Ukai semina deka napi pasang besai tang kitai deka nyikap diri ba baruh gerah Kaunsil Pengelikun Menua (MKN).
“Kitai udah dikerah nyikap diri berengkah ari bulan November nyentuk  March.
“Semua ejensi mesti seruran bejejaga sereta nyikap diri napi semua risiko. Reti iya, Â perengkaguna, pengereja pengawa enggau pemakai ari pengintu pengelantang pendiau mesti disediaka,” ku iya.
Iya munyi nya ngagai media sepengudah ngabas Palan  Pengenduh  (PPS) SK Sampun Tebun di Asajaya , kemari.
Uggah nyemetak madahka, JPBNS mega udah nyendiaka pelin penyikap  enggau nambahka koordinasyen entara ejensi-ejenjsi ti ngaul diri dalam pengawa nyelamat orang tasah bah sereta nyendiaka  bantu.
Iya mega ngelalau mensia mayuh ngambika seruran nitihka atur raban bekuasa sereta nentuka pengelikun diri enggau ruang bilik  sepemanjai musin ujan  serak tu.-TVS
