KUCHING, 1 Feb: Lebih 12,000 iku pengani ke datai ari 3,618 ruang bilik di Sarawak benung ngenduh ba 62 Palan Pengenduh (PPS) naka pagi Hari Enam.
Penambah nya dirikodka berindik ari sebuah PPS dibuka di Sibu lemai kemari.
Analisis pasal model pelaba gaya hari pemadu baru nunjukka ujan monsun dijangka terus nyadi nyentuk ke 1 Februari 2025, Hari Enam.
Opis Meteorologi Malaysia (Met Malaysia) nengah sebengkah penerang madahka, pelaba nya mega tau ngujungka hari ujan berunggu terus nyadi di Sarawak.
Nitihka penerang ari Pengari Bejaku Sekretariat Komiti Penyangga Penusah Ngenyit Nengeri (JPBN) Sarawak, ari penyampau nya 12,264 ari 3,570 ngaul orang tasah bah ke ngenduh 6 PPS.
Kelimpah ari nya, 169 ari 39 ruang bilik ngaul orang tasah ketegal penusah tanah tusur ke diatu benung ngenduh ba tiga PPS.
Tandu penerang nya, 37 ari semilan ruang bilik, iya nya ngaul orang tasah ketegal penusah angus rumah panjai ke benung ngenduh ba sebuah PPS.
Nangkan ke nya, nitihka data pemadu baru raban Pengetan Pengelikun Periman Malaysia (APM) Sarawak, naka 1 hari bulan 2 2025, tujuh bagi menua, 18 pelilih benung napi penusah ampuh bah di Sarawak.
Bisi 12,692 (ngaul 3,696 ruang bilik) raban tasah benung ngenduh ba 63 PPS ke aktif di selampur nengeri tu.
Mensia mayuh terus dilalau seruran meda penerang pemadu baru ba laman web www.met.gov.my sereta media rama rasmi Met Malaysia sereta bantai turun aplikasyen Mycuaca ti deka nemu penerang gaya hari ke betul sereta nemban.-TVS
