MIRI, 1 Feb: Gis Sintetik ti deka diasilka Sarawak engka ulih nukar reaktor nuklear modular, ku Datuk Patinggi Tan Sri Abang Johari Tun Openg.
Premier Sarawak nya madahka, gempung teknologi enggau puncha kuasa ke dipenggi Sarawak deka meri pengelebih strategik dalam nempa chara mutarka kuasa ke lebih meruan sereta bisi daya semekih.
“Diatu, bisi teknologi ke alai hidrogen bechampur enggau karbon deka ngasilka gis sintetik, metana sintetik enggau metana ti ulih ngasilka kuasa lalu tu engka ulih nukar reaktor nuklear ke dikumbai reaktor nuklear modular.
“Nuklear tu begunaka uranium lalu uranium ukai muntang digiga, tang di Sarawak mayuh hidrogen. Sarawak. Ukai semina metana aja, kitai bisi hidrogen ari ai.
“Dalam reti jaku bukai, utai ke dipadahka aku ditu iya nya, kitai kaya enggau kuasa,” ku iya.
Iya mansutka jaku nya rambau Pengerami Makai Lemai Berserimbai Taun Baru China ke diatur SUPP Bagi Menua Miri, malam tadi.
Tandu iya, manggai taun 2027, Miri deka mujur ngasilka 500 megawatt kuasa ari ‘Combine Cycle Gas Turbinee’ (CCGT).
CCGT ke benung digaga diatu deka nyadi puncha kuasa ba loji kuasa baru ke deka diasilka Mitsubishi.
Nya alai, ba jam ke diatu, perintah sarawak deka meri tumpu ngagai pemansang di selampur wilayah sereta beratika penegap ke bisi ba tetiap kandang menua tu.-TVS
