BINTULU, 31 Jan: Kerejasama rat ngaul mensia mayuh, pengari rayat, ejensi perintah enggau raban peribit ngemudahka pengawa ngesah sereta mantu raban orang tasah bah di Bintulu.
Sapit Menteri Infrastruktur Enggau Penyangkai Kapal Sarawak ke mega ADUN Samalaju, Dato Majang Renggi, meri terima kasih ngagai semua raban pengereja enggau sida ti bela besaup meri komitmen sekumbang penusah ampuh bah nuntung di bagi menua nya.
Nengah penerang ba laman Facebook iya kemari, Majang ngarapka semua orang tasah ketegal ampuh bah sabar napi penguji sereta seruran menatika pengelikun sida enggau diri sebilik.
“Mensia mayuh enggau orang tasah bah dilalau nitihka gerah enggau jaku tangkan ke diberi raban bekuasa dikena nyeliahka penusah enda disadang nyadi,”ku iya.
Iya mega meri terima kasih ngagai Komiti Penyangga Penusah Ngenyit Pelilih (JPBD) Bintulu ti chakah enggau sikar bejalaika pengawa.
Kemari, Majang bisi ngabas ngagai sitak Kidurong Avenue Park ba Jalai Tebing Tasik Bintulu-Samalaju.
Udah nya, iya bisi nurun ngabas orang tasah bah ba Palan Pengenduh (PPS) Pusat Sukan BDA Kidurong.
“Aram mih kitai semua terus besaup enggau begempung meri bantu sereta merambu pekara ke patut dipejalaika sechara silik,”ku iya.
Seninjik ngabas PPS, iya berumban ngagai Opis Residen Bintulu ngulu taklimat khas ari Sapit Menteri Besai, Dato’ Sri Fadillah Yusof bekaul enggau penusah ampuh bah ti benung nuntung Bintulu jam ke diatu.
Sama bisi ngulu taklimat nya, Sapit Premier Sarawak ke mega Chairman Komiti Penyangga Penusah Ngenyit Nengeri (JPBD) Sarawak, Datuk Amar Douglas Uggah Embas, ADUN Tanjong Batu, Johnny Pang Leong Ming sereta ADUN Jepak, Iskandar Turkee.
Udah nya, iya terus ngabas PPS Dewan Suarah Bintulu, lalu terus ke PPS SMK Asyakirin, Sungai Plan.-TVS
