KUCHING, 30 Jan: Komiti Penyangga Penusah Ngenyit Nengeri Sarawak (JPBNS) udah digerah ngambika terus matau gaya penyadi tanah tusur di Miri, berindik ari insiden ke nyadi ba Kampung Lereng Bukit Miri, tumu pagi Hari Tiga tu tadi.
Premier Sarawak, Datuk Patinggi Tan Sri Abang Johari Tun Openg madah, pengawa matau nya beguna amat dikena ngelala ni bagi endur ke mudah dituntung penusah sereta ngadang tumu dikena nyeliahka penusah ke enda disadang.
“Aku udah minta Datuk Amar Douglas Uggah Embas (Chairman JPBNS) matau gaya hari ba nengeri tu ungkup timpuh dua enggau tiga hari laban ripot ti dikeluarka Opis Meteorologi bisi mantaika pelaba penyadi hari ujan berunggu nyentuk ke 31 Januari tu,” ku iya.
Iya mansutka jaku nya rambau dirandau raban media seninjik ngabang Taun Baru China 2025 ba rumah tukuh dagang, Dato Goh Leng Chua ba Jalai Tan Sri Datuk William Tan, malam Hari Tiga.
Berebak enggau nya, Abang Johari nyemetak madahka, perintah nengeri deka nambahka pengawa matau enggau chara nyeliah ba endur ti bisi risiko penusah tanah tusur ulih nyadi.
Tebal agi, ba endur bebukit sereta tanah tinggi berindik ari hari ujan bangat berunggu ke agi nuntung menua tu.
Abang Johari meri jamin pasal Perintah Sarawak deka nentuka pengelikun enggau pengelantang rayat seruran dikenatika.-TVS
