MIRI, 26 Jan: Raban Polis Marin (PPM) Wilayah 5 Sarawak ngerampas segerit dibai tama belalai berega RM1.6 juta nengah OP Taring Landai di Jalai Miri Bypass ditu, kemari.
Komander Raban Polis Marin Wilayah 5, ACP Abdul Rahman Mat Hasan madah, ba operasyen ke dipejalaika urung 12.35 tengah hari Unit Penyubuk Marin (URM), raban sida mujur ngetan sebuah van Toyota Hiace bechura burak ke dibai siku lelaki peranak menua.
“Asil peresa ba dalam van nya bisi tetemuka 432,000 batang segerit chap Gudang Garam Surya nadai stika chukai Kastam. Deriba van nya mega puntan meri sebarang dokumen ke sah ari raban Kastam.
“Suspek didawa ngelanggar Seksyen 135 (1) (d) Akta Kastam 1967 laban ditemu ngibun, nyimpan tauka ngundan barang nadai pemendar Kastam,” ku iya nengah sebengkah penerang sehari tu tadi.
Ku iya, barang ke dirrampas enggau saspek udah diserah ngagai Pegawai Pansik Unit Pemansik Jenayah, Indu Opis Polis Pelilih (IPD) Miri ungkup pansik silik.
“KItai deka bebendar agi bejalaika operasyen dikena munaska ulah mai tama belalai, lebih agi ba sitak Miri enggau selampur Sarawak.
“Operasyen baka tu kelai komitmen dalam nentuka aktiviti mai tama belalai ulih diputar lengkas, ke pemaik rayat enggau menua,” ku iya.
Berebak enggau nya, Abdul Rahman nesau mensia mayuh terus ngaga ripot bekaul enggau ulah mai barang belalai enggau jenayah bukai dikena mantu raban bekuasa bejalai atur ke patut.
“Pengawa ngerampas nya mandangka pengasi enggau komitmen ke manah dipandangka bala kaban penyaga pengelikun ungkup pengelantang menua,” ku iya. – TVS
