KUCHING, 25 Jan: Pengawa ngaga Sepital Petra Jaya diatu benung ba tikas ke manah enggau udah nyapai 82 peratus tembu, ku Datuk Lukanisman Awang Sauni.
Sapit Menteri Pengerai nya madahka, sepital nya diperambu tembu penuh dalam bulan lapan taun tu, lalu dipelabaka deka dibuka ba suku keterubah taun baru.
“Aku baru udah nerima penerang. Naka ke diatu, pemansang Sepital Petrajaya dalam gaya ti manah amat. Peratus nya ba tikas 82 peratus lalu kami melabaka enti nyema gaya hari enggau kereban dikena ngaga (sepital) nya bejalai enggau lanchar, kami melabaka iya tembu penuh ba bulan Ogos.
“Tang empai deka berengkah beoperasyen sepengudah tembu laban nya ukai lalu siap tekala nya, nya deka begunaka proses. Lalu kami melabaka ba suku keterubah taun 2026, kitai ulih bejalaika operasyen sepital ti lama udah dianti di Petrajaya,” ku iya.
Iya madah munyi nya rambau aum media sepengudah ngulu Program Walkbout Premis Beresi, Nadai Sebun (Bibas) enggau War on Sugar Renggat Sarawak ba Topspot Food Court Kuching, kemari.
Sebedau tu, Menteri Pengerai, Datuk Seri Dr Dzulkefly Ahmad madahka, opis menteri iya enda ngemendarka sebarang pengawa nangguhka timpuh nembuka projek nya lalu iya ngarapka kunteriktor ulih nitihka taga tembu ke udah ditetapka.-TVS
