KUALA LUMPUR, 25 Jan: Premier Sarawak, Datuk Patinggi Tan Sri Abang Johari Tun Openg dibasa nerima Anugerah Felo Basa Malaysian Institute Of Planning (MIP).
Iya nerima anugerah nya rambau Pengerami Anugerah Penyulut Perambu MIP 2024 ti disuaka Menteri Besai, Datuk Seri Anwar Ibrahim.
Anwar nengah jaku iya madahka , pengawa milih Abang Johari nya endang nemban laban iya udah mandangka pengawa nyadi ketuai ti chukup nyulut sereta nemban.
“Abang Johari siku ari tukuh ke dikelala aku ti mandangka, enti nyema politik nengeri nya (Sarawak) tegap, ketuai ba baruh iring iya meri tumpu ngagai pemansang nengeri.
“Berunding, nyeranggap, baka ni kuing tuju enggau penemu polisi baru. Iya (Premier Sarawak) enda bepanggai enggau iring lama. Nyadi iya ngiga jalai.
“Orang bejaku pasal kuasa alternatif, orang bejaku pasal muka ruang, rembus tasik ngambika ngulihka asil ti manah ngagai nengeri. Bejaku senentang hidrogen gadung enggau ammonia.
Lalu pekara tu ulih dipeda kitai entI nyema iring tuai nya bisi juluk enggau pemereti ati sereta mai semua rintai tuai perintah nengah kerejasama sektor peribit enggau universiti dikena nyapai juluk nya,” ku iya.
Iya munyi nya rambau Pengerami Nyuaka Anugerah Penyulut Perambu MIP 2024 ba sebuah hotel tebilang ditu kemari.
Nangkan ke nya, nitihka penerang MIP, pengawa milih abang johari digaga bepelasarka penyulut iya nyadi ketuai, nyengkaum nengah inisiatif pemansang mengeri, kuasa enggau pemeruan rampa menua enggau mai Sarawak nyadi nengeri bepenatai pemisi tinggi.
Kelimpah ari nya, nyungkak transformasyen nengeri tu nengah inisiatif global sereta nyadika sarawak pengerandang besai ekonomi gadung dalam nyapai pemansut karbon kusung manggai ba taun 2030.
Ba pengerami ke sama, Sarawak Electronic State Planning Authority System mega mega bela nerima Anugerah Presiden MIP, ti ngayanka penyulut dalam transformasyen atur pengawa merambu nengah inovasyen digital.
sama bisi datai nerima anugerah nya, Sekretari Perintah Sarawak, Datuk Amar Mohamad Abu Bakar Marzuki enggau Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh.-TVS
