KUALA LUMPUR, 25 Jan: Bisi 73 iku siswa Dayak ba Universiti Malaya (UM) nerima bantu belanja ari Sapit Premier Sarawak, Datuk Amar Douglas Uggah Embas.
Presiden Gerempung Alumni Dayak Universiti Malaya (PADUM), Cooplay Nyipa nyuaka bantu belanja nya ngarika Uggah.
Uggah ke nyadi penyanding penemu padum mega siku alumni UM.
Beduduk enggau nya, ku Cooplay madah, bepelasarka data ti diambi ari Opis Pekara Siswa UM, diatu bisi 322 iku siswa ke benung nampung pelajar ba tikas degree sereta program matrikulasi UM.
“Ari 322 iku siswa nya tadi, kurang lebih 83 peratus iya nya siswa Dayak ke datai ari ruang bilik B40,” ku iya.
Iya meri pengaga ngagai Uggah enggau kaban PADUM laban udah meri bantu belanja ke nyadi insentif sereta program bantu ungkup siswa Dayak.
Sama bisi datai ba pengawa nyuaka bantu nya, Sapit Mandal Chancelor UM (Pekara Siswa), Prof. Dr Zamri Radzi enggau Prof. Madya Dr Muhamad Shakirin Mispan, Direktor Palan Pemansang enggau Pengawa Nyadi Pedagang Siswa, Prof. Madya Dr Julia Patrick Engkasan, Dr Pozi Milo sereta bala kaban PADUM.
Nangkan ka nya, Prof. Madya Dr Muhamad Shakirin Mispan nerangka, 67 peratus ari siswa ke bekaul, datai ari ruang bilik B40.
Ku iya madah, kos pengidup minima ungkup tetiap iku siswa dianggarka manggai RM1,000 sebulan, nyengkaum yuran.
Prof. Dr Zamri Radzi rambau program nya muji inisiatif ti dipejalaika padum dikena mantu siswa ke datai ari ruang bilik kurang penatai pemisi.
Tandu iya, UM ulih bekerejasama enggau padum ngatur achara ti mandangka budaya Sarawak, tebal agi budaya komuniti dayak ngagai mensia mayuh.
Iya mega ngarapka gerempung bukai ulih mantu siswa ngambika ngelempungka tating belanja sida.-TVS
