KUCHING, 24 Jan: Projek ngaga padang bilun baru ba Tanjung Embang sempama baka gula laban semua raban deka bulih penguntung ari penembu projek nya.
Siku Pemikir Politik Sarawak, Profesor Dr. Novel Lyndon, projek tu dipelaba deka meri empas besai ngagai pemansang ekonomi, rama, enggau fizikal ba kandang menua pesisir.
Ku iya madah padang bilun baru tu deka nyungkak pemansang nyengkaum pemansang fizikal, ekonomi enggau rama.
Nampung berita ari Suara Sarawak, iya madahka projek tu deka mantu nyapai status nengeri mansang rambau taun 2030.
“Proses urbanisasyen enggau ngemesaika mengeri deka nyadi nengah projek berumah enggau fasiliti servis perintah.
“Kandang endur Asajaya, Samarahan, enggau Serian deka nyadi palan penumbuh ekonomi baru ke ulih matak pemeranak puku ari menua luar sereta domestik,”ku iya.
Lyndon mega nyemetak madahka projek tu deka meri peluang ngagai Industri Mit Enggau Jelan Pemesai (PKS) sereta pedagang mit ngambika bulih penatai pemisi seraya nambahka kuasa beli penguna enggau negapka ekonomi Sarawak.
Kelimpah ari nya, projek padang bilun baru tu mega dipeda nyadi siti inisiatif ti chukup strategik dikena ngurangka penanggul penyekut jalai, seraya nambahka kualiti pengidup peranak lokal.
Berebak enggau nya projek tu dikearap ulih nyadi seput ungkup pemansang baru ti mantu dalam pemansang sarawak.-TVS
