PUTRAJAYA, 24 Jan: Beserimbai enggau pengawa nyadi chairman ASEAN 2025, Malaysia deka nguna manah Hari Pemberita Nasional (HAWANA) dikena ngempuruka pemekuh media ari organisasyen enggau serikat media rantau ASEAN ungkup negapka kerejasama.
Menteri Komunikasyen Fahmi Fadzil madah nya dipelaba deka nyadi ruang ke chukup beguna dikena berandauka kuing tuju enggau pemar ubah industri media lebih agi di rantau ASEAN.
Fahmi madah raban sida mega merambu deka ngatur sekeda program khas renggat ASEAN ba Kuala Lumpur endur berundingka isu bekaul sechara silik lebih agi senentang pesai ditapi ba dunya media digital.
Dikena nyapai tuju nya, sekeda pengari media ari menua-menua ASEAN deka dikangau sama ngambi bagi.
“Kitai nemu semua media diatu betapi enggau pemar media rama iya nya ungkus iklan nyau majak kurang ungkup serikat media lalu mayuh serikat ke nguna belanja iklan sida ba pantar media rama.
“Kelimpah ari nya, udah tentu isu pengelebas media, atur, pengawa pemberita enggau mega berita pelesu ke nyangka mudah ngerembai ngujungka ulih ngeruga pemanah nama industri media, serikat-serikat media,” ku iya.
Iya mansutka pekara nya ngagai media pengudah ngulu pengawa Gempuru Ninting Bulan Opis Menteri Komunikasyen ditu, kemari.
Kelimpah ari nya, pantar nya mega meri fokus dalam beratika isu ke bisi dibantai enggau ngiga buah runding dikena mutarka sesebengkah isu ngambika ulih dibai ngagai opis menteri ke bekaul.-TVS
